KUNS

Kunsonderrig word aan leerders in alle grade aangebied deur gekwalifiseerde en ervare kunsonderwysers. Leerders word aan verskeie vorme van visuele kuns bekendgestel, waaronder teken, skilder en pottebakkery.

’n Verskeidenheid materiale en tegnieke word gebruik, onder andere temperaverf, akrielverf, papier-mâché en draad. Die fokus is op die ontwikkeling van kreatiwiteit, tegniese vaardighede en individuele artistieke uitdrukking.

Behalwe vir die kuns wat as deel van die kurrikulum aangebied word, bied die skool jaarliks kunsseleksiewerkswinkels aan. Leerders kry die geleentheid om tydens hierdie werkswinkels oudisie te doen vir ’n plek in die na-ure Kunsklub. Die Kunsklub bied aan geselekteerde leerders die geleentheid om hul kreatiewe vaardighede verder te ontwikkel en hul artistieke talent te verfyn.

TONEEL

Laerskool Welgemoed beskik oor twee toneelgroepe wat leerders die geleentheid bied om hul liefde vir drama te ontwikkel en hul toneeltalent verder te verfyn.

Juniortoneel is ’n ontwikkelingsgroep vir graad 4- en 5-leerders. Leerders neem jaarliks aan oudisies deel om ’n plek in die groep te bekom. Die fokus is op die ontwikkeling van toneelvaardighede, selfvertroue en verhoogaanbieding.

ACT Seniortoneel bestaan uit graad 6- en 7-leerders wat deur middel van oudisies gekeur word. Die groep bied aan talentvolle jong akteurs die geleentheid om hul vaardighede op ’n hoër vlak te ontwikkel en aan verskeie toneelkompetisies deel te neem. Die ACT Seniortoneelgroep neem onder andere deel aan die Fraserburg Logan Toneelfees, Montagu Toneelfees en ATKV-Tjokkertoneel.

EISTEDDFODS

Ons leerders neem jaarliks aan verskeie eisteddfods deel. Leerders van graad 1 tot 7 kry die geleentheid om hul talente en vaardighede in ’n wye verskeidenheid afdelings te ontwikkel en ten toon te stel.

Afdelings sluit onder andere poësie, kreatiewe skryfwerk, kuns, drama, sang, prosa, musiek, openbare redevoering en skrif in.

KOOR

Leerders in graad 2 en 3 kry die geleentheid om vir die Juniorkoor te oudisie. Elke leerder se stem en musikale vermoë word individueel beoordeel.

Aan die einde van graad 3 vind verdere oudisies plaas, waarna suksesvolle kandidate tot die Seniorkoor toegelaat word. Die Seniorkoor bestaan uit leerders van graad 4 tot 7.

Albei kore is aktief betrokke by die skool se kultuurprogram en tree op uitnodiging by kerke, konserte en verskeie sosiale geleenthede op. Die kore behaal jaarliks uitstekende resultate by eisteddfods, waaronder die Stellenbosch-, Tygerberg- en ATKV Applous-eisteddfods.

REDENAARS

Leerders van graad 5 tot 7 kry jaarliks die geleentheid om aan die ATKV-redenaarskompetisie sowel as verskeie eisteddfods deel te neem. Deur hierdie deelname ontwikkel leerders hul selfvertroue, redenaarsvaardighede, kritiese denke en vermoë om hul idees met oortuiging aan te bied.

PRIVAAT LESSE

’n Wye verskeidenheid kulturele aktiwiteite word op die skoolterrein deur professionele en gekwalifiseerde persone aangebied. Hierdie aktiwiteite vind buite die formele skoolprogram plaas en is teen addisionele koste beskikbaar.

Aktiwiteite sluit onder andere musiekteorie, klavier, blokfluit, viool, kitaar, klawerbord, sang, dans en ballet in.